2006

二零零六年,成為一條真正o既咸魚,每一日都係行屍走肉一樣,冇咩野回憶,冇咩野留戀,離"開心"兩個字最遙遠,想死o既次數最多o既一年.

F U C K 2 0 0 6
二零零六年,屌你.

就如李力持谷德昭的笑片

o岩o岩睇完林海峰o既踎底噴飯,睇今日個標題都知一二: 雖然失望又談不上,不過最多只係算不過不失.

內容我就唔多講不過都要提一提,首先我冇睇上一次o既是但o翕所以冇得比較,不過可以想像黎黎去去都係日常生活身邊o既野啦, 所以件事就係佢點響哩d野上面發揮. 近年都唔少人玩棟督笑哩樣野,難免都係要同黃子華比一比. 有睇開黃子華o既野,都應該會發現每一次佢都係圍繞住一個主題去發揮,有一個明顯o既核心, 每一個轉折都會回歸去核心,整體控制得好有節奏. 哩方面林海峰就完全被比下去. 可以見倒佢o既show就好似一場演唱會咁係向前推進,每一次轉題目都係好明顯咁話比你知 "我要轉喇!"咁,結構相對地鬆散令人抓唔住場show o既主旨, 而且節奏經常都有過快什至開始失控o既情況出現 (佢本人都講錯幾次野) .整個show o既感覺就好似睇緊李力持同谷德昭o既笑戲咁,明顯地係gag撘gag,中間再硬生生咁串起佢,所以即使gag位再好笑都好,你都好難對個show有印象,睇完笑完都唔知自己睇過乜.

所以你明點解我唔講內容啦.

再睇埋佢出面賣tee賣帽郁下都三百幾四百蚊,單件計cost應該mark up 2000%以上,實在令人有d懷疑佢究竟係咪醉翁之意,o既呢?


(呀另外,聽商台d節目,成日都講今次個show好笑過上次,咁講,上次咪好大鑊?)

我的第四,第五和第六條腿

Velbon Neo Carmagne 530 + Giottos 1201-MH652

"豪鬼出現了!"

是日震驚

睇之前冇理過staff果方面o既野,睇到3先見倒 ,



細佬我真係大表震驚.
不過好在唔係做監督,唔係一陣飲啖酒又飛上天咁就真係大大都冇咁大鑊.

史上最柒GR

RICOH GR系傻瓜機,由菲林時代一向係好多鍾意影相o既人 o既心水二號機隨身SIDE ARM, 尤其係袋入面錢唔多,當年o既GR-1/ GR-1V係買唔起T3之類更高貴o既傻機o既必然之選,始終以咁o既價位,佢o既機身,操作同鏡頭都係十分唔錯的. 後黎o既超廣角GR-21亦都係我果陣時o既尖機 ;當然以而家o既炒價就只有尖上加尖,直頭得個尖字.

轉到哩個數碼時代GR開始被人遺忘o既時候, ricoh竟然不怕死地拎番GR哩個名再出部GR digital,亦都遺傳番GR系o既特點 :定焦鏡半手動好手感同走高價路線,主攻已有DSLR o既客都係做佢o既hand gun. 當時佢公佈哩部野果陣我都覺得係gimmick多過實際, 而事實佢成像都唔係真係咁出眾 - 至少要搵出黎o既野平過佢又殺得低佢o既真係唔難, 我就真係唔多比倒自己理由去買佢喇....好可惜,響香港因為多得d"潮書"炒作一下,明星又用下咁就忽然間好多唔知頭唔知路o既人又話要買佢喇. 咁總之啦, 可能部GRD都ok賣得咁,早排佢就公佈左一周年紀念版o既GRD :




感覺似乜?

我第一時間就諗倒 "拎部NOKIA 3210 去包膠 " 咁o既樣.
唔好同我講公仔呀顏色有咩典故,總之都都係一個字--

柒呀!!

今次真係睇住ricoh夾埋寺田克也黎老強GR o既威名!
寺田克也?係呀上面果隻公仔就係佢畫架,不如求其叫佢佢響上面簽個名算啦,丫笨!

擬人法之極至

從來讀書作文都有樣野叫"擬人法", 就係用描寫人o既手法去寫動物無機死物增加人性趣味性之類之類咁. 近年架仔國可以話將哩個擬人化愈玩愈狂愈玩愈痴線,花草樹木飛機大炮虛擬真實都擬人一番,其中好多亦都去到九唔搭七 on論99 o既地步. (拎住個機頭你就話係擬人?我唔o岩都唔好咁hea我好喎大師~) 不過最強最絕 o既擬人化唔駛隔個海,身邊就搵得倒.

近日響人地推介之下睇左土炮漫畫家小克o既 <偽科學鑑証>, 其中 "維港巨星" 同 "海洋劇場" 中可以話將擬人化發揮至極.

維港巨星就係將對面海多橦建築物好似國金匯豐中圖力寶等化身成機械人,最強o既係根據建築本身o既地區,特色以至國情去建立出角色. 好似合和係老灣仔,中圖會發射佢粒"天行健",成班會拎住電筒同巨型"滴滴金"表演幻彩詠香江之後又會怨堂堂維港巨星要扮鬼扮馬....最絕o既係匯豐成日咩事就會問中圖 "點算呀中央?!" ,極之爆笑! 雖然短短地得幾編,不過已經比你見識倒咩人真正"有血有肉" o既擬人化, 尤其如果你對而家攪到鬼五馬六o既中環有d感慨o既話睇起黎就更投入.

而"海洋劇場"拍埋"維港巨星"一比就少左點點政治味,比較小品. 主角就係幾年前都仲好紅o既海洋公園大熊貓 "安安"同"佳佳". 不過兩隻野個性格就十分之祖國同胞 :工作"hea"住咁做,自己都未分得倒你係安安定佢係佳佳, 成日唔郁比人話"係咪假架d熊貓!" 比起維港巨星,哩對熊貓o既無聊度可謂更上層樓 : 睇過期星座書,扮神州六號, 收養1619一對熊貓仔,福娃戰隊收人, 扮米奇入老鼠樂園踩場等等,都係身邊以發生o既事黎創作, 其細橋之無聊可以話世間少有. 而安安同佳佳而家亦都有主演新系列"聾貓",其食字gag之爛簡直令人拍案叫乜!!

絕對值得推介o既土炮漫畫!