LONG TIME NO SEE!

從來集體回憶都係最令人感動o既事,一萬人一齊經驗過,一萬人份o既共鳴,邊有唔感動之理.
以演出黎講,睇兩個唱歌唔係好好聽,跳舞又唔係好好睇o既三字頭開演唱會,實在真係搵唔倒咩理由.
當初知道佢地要開show,當然決定一定要睇!不過第一個浮出黎o既問題就係:

"佢地開show做乜?"

我相信同我一樣,以萬計o既人都有同一樣o既疑問,而又乖乖咁抱住個疑問排隊撲飛入場.

"睇乜?唔知呀,唔會唱歌掛?"

記 得有人講過,就算佢地成個show都係坐響度播番舊野,都一樣咁多人去睇.哩樣又真係呀,衰d講,就係打緊感情. 入場,因為佢地,係佢地.就係所謂由細聽到大,雖然佢地出道果陣我都仲讀緊小學,不過永遠都唔會忘記星期六晚黑11點比人鬧住都仲要聽老人院o既日子. 明明都唔知幾多年冇聽過佢地o既歌,佢地唱果陣又可以好似撞邪咁一字不漏背番晒出黎,因為我地都係親身經歷果一個時代,咩野面和口和心不和o既野,我諗都 冇咩人會理,只要佢地兩個行番埋做d野出黎,就會睇.

就係因為"軟硬軟硬我地支持你,我諗我係fans".