十年一次!

有幾多野你會十年都唔做一次呢?我今日就做左一樣都成十年冇做過o既野:

游水!!

唔知點解會咁多年冇游過水,又唔會話特別避開唔做,可能係因為冇機會?又唔會特登走去游咁.
不過人地講得o岩呀,有d野學識左,就一世都識. 其一,就係游水,其二,係渣車. 今日就証實左一係真o既!十年冇游過水落水都死唔去,郁左幾郁之後就識游番. 其二我就十分希望係真架啦,我個牌都大大話話考左成兩年,考倒之後一次車都冇渣過... (打機唔算!)
講番游水,丫游番先知原來我係幾鍾意游水架喎~!成個細路咁又浮又潛游左成個幾鐘,加埋熱到死得人o既天氣之下游真係爽死. 有機會真係多d游先得,最好一個星期抽倒3~4日,又最好日日都可以游!

健康活動萬歲!!