耳機周-上集

因為對粗用philips 9500用得太粗,日前壽終高速正寢o既關係,今個星期就要物色一對平價入門200蚊以下o既earphone. 初時,好自然就係諗倒平價之霸,中國人的驕傲,漫步者h260. 用左3日,感覺嘛,以哩個價位同級,各方面應該都可以以高點數勝出,

bass量足又夠實淨,人聲夠清,分析力高,以全新未run in黎比,分數比起E2C仲要高 (個人覺得)

不過,係咪咁係咪就無敵晒呢?我又覺得唔係.

高音太尖,人聲清得黎太冷,分析力高到將全部野分得清清楚楚一件件,音樂感不足,bass量雖然未至過大,不過壓迫感好大,連埋其他聲一齊壓入耳道,即使音量唔大都見辛苦.

另外又因為要幫人買一對平價earphone,所以又可以試多隻,今次就搵左對風格完全唔同o既in ear, ATH o既CK5. 價錢,比H260仲要平幾十. 不過,

對野出左名低音不足,直頭可以話冇bass,此其一敗.
分析力同H260可以話差天共地
賣點之一o既loop support我完全唔buy,直頭頂到耳仔痛痛地

又不過,出奇地,令人聽得舒服,好可能高音冇H260咁尖,低音係少不過又唔算散,一下就一下兩下就兩下,人聲都要暖D,聽女聲要比H260 o岩耳好多,有人評ck5 d人聲好似由太空飛番入黎,反而我就覺得係h260迫得太緊.

所以,雖然H260各方面得點都要比CK5高唔少,不過我個人都係鍾意CK5多D. 聽聞煲過之後H260 o既bass會收,而ck5各方面都會有改善,又即管睇下半年後會點.

又,其實,哩對earphone,我主要係要黎聽電話,睇片同打機而唔係聽歌,所以真係唔太大關係,

又所以,哩個係耳機周o既"上集"呢.